2Cor 11 | BNP | STEP | Mu hatenono taro. Ga ta manga manga popote. Mu hatenono taro.

2 Corinthians 11

A Nitamina Apostolo

1 Mu hatenono taro. Ga ta manga manga popote. Mu hatenono taro. 2 ^aIau a bage ne mua i manga a Vure i bage ne mua. Mu manga a sirula a habikaria na bakovi ala taku kunana, re Kristo. 3 ^bPali a mangenge, ma ni gi tami mua, mu gu lobo ni luhoia e Kristo na naro malamala, na naro muholi, i manga hosi a mata i tamia e Eva. 4 ^cE huriki ranga ri bele ne mua, ri vara mua ne Isu, i tebi na ngava a vara mua vona, o ri vara mua na Hanuna Vure, i tebi na ngava a vara mua vona, o ri vara mua, i tebi na Velenga Kamumu mu luhoi tora mugea. Pali i navai mu vivi ni longo mai kunana?

5 ^dRe huriki nga, ri tovo mua na maka ngava taminga, ri taki ria, ta ria a apostolo kamumu hateka. Pali iau a lohoka vona, i uka ma ri rangi iau. 6 ^eI muholi i uka ma a voro kamumu hateka a ngava. Pali i uka ma a bala a lohokanga. A vakasiri mavonga ne mua pali na naro legelege na parava vakaroro.

7 ^fIau a tovo mua na Velenga Kamumu na Vure, lakea a vakakiroko iau, i uka ma a taki mua mu gu kona iau. Pali mu luhoi navai? A rata a rabu hale? 8 ^gNa tahuna a tovo mua, e huriki a tara na Vure na tanga ranga ri kori iau na moni. Iau i uka ma a kori ria ri gi kona iau. I manga a bole tavula a moni ne ria, a lakene, a leho tavula turane mua. 9 Na tahuna a made turane mua, lakea a bala a maki, i uka ma a bole ne mua ranga maki. I uka ma a vakapae mua, a vuhuna e huriki a turane hita o Masedonia ri valai ri habi a maki nau. Hosi i uka ma a vakapae mua. Muri ma ranga, i uka ma ga vakapae mua. 10 Iau a vivi vona a hini i uka ma a vakapae mua na tahuna a made turane mua. A ngava muholi ne Kristo i tabuli na hategu, lakea a taki muholi mua: I uka tara viri na tabeke ne Akaia ge hatekakari iau vona a ngava nga. 11 I navai a rata mavonga? A rata mavonga a vuhuna a ngaru hateka mua. A Vure i lohoka vona iau a ngaru hateka mua.

12 I muga i uka ma a bole a moni ne mua, muri ma ranga i uka ma ga bole a moni ne mua. A rata mavonga, e huriki ri taki ta ria a apostolo kamumu hateka, i uka ma ri gi taki ri manga iau. 13 E huriki a bakovi nga, a nitamina apostolo. Ri tami e huriki na leho ne ria, ri tamilalu ta ria a apostolo ne Kristo. 14 I uka ma a turutu ne ria, a vuhuna e Satan tara i tamilalu, ta ia a agelo na nipara. 15 Lakea i uka ma si gi turutu vona na tahuna e huriki a vora ne Satan ri tamilalu, ta ria a vora malamala na Vure. Muri ma bara ri bole a mapana rabu hale ne ria.

A Maka Maregoa e Paulus i Bole

16 A taki tabu mua, naha ni luhoi ga ta manga manga. Pali mua mu gu luhoi ta iau a manga, pali, mu longo kunana a nitagu. Ga bibi taro. 17 Ra naro ni bibi rike mule iau, i uka ma a narone Bakovi Dagi. A narona manga. 18 Pali e huriki ranga ri leho turane mua ri bibi rike mule ria vona a leho na malala ri ratea. I mavonga, iau tara ga bibi rike mule iau. 19 Mu pahaluhoi ta mu moro hateka, pali mu vivi hateka ni longo mai a ngava ne huriki a manga. 20 I navai mu ngaru e huriki ri vakavora mua, ri bole tavula a maki ne mua, ri vakaholi mua, ri rata polo muga muga ne mua, ri ta hale mua? 21 ^hIau i uka ma a rata a maka rabu nga. Mu luhoi navai, ga maruhu a vuhuna i uka ma a kinigao ni rata a rabu hale nga? Iau ga bibi rike mule iau, a vuhuna e huriki a nitamina apostolo nga ri rata mavonga. Ngane a ta manga a manga. 22 Ri taki ria, ta ria a Hibru. Iau tara, iau a Hibru. Ri taki ria, ta ria a koma o Israel. Iau tara, iau a koma o Israel. Ri taki ria, ta ria a hamone Abraham. Iau tara, iau a hamone Abraham. 23 ⁱRi taki ria ta ria a vora ne Kristo. Iau a rata hateka a leho ne Kristo! Masia, ngane a ta manga manga! Ri leho popote, pali iau a leho hateka. Ria, i uka ma ri dili na bavi, pali iau ni ru dili na bavi balaka kupo. Iau ni lagu hale balaka i kupo hateka, a keri ni gi. Iau popote ga mate balaka kupo. 24 ^jBalaka lima e huriki a Iuda ri lakavu iau, ri lagu iau na lebo balaka ravulu tolu a polona i polova (39). 25 ^kBalaka tolu e huriki a Rom ri lakavu iau, ri lagu iau na kai. E huriki a Iuda ri padi iau na kedo, ta ri gi padimate iau. Balaka tolu a sip a rike vona i mabubu. Na parava tara a sip i mabubu, a pasi na utu na parava i taku, a rodo i taku. 26 ^lBalaka kupo a havai, i bole butubutu iau a vuranga. Na tahuna ranga a bole butu a vuranga na tahuna a tulu polo a naru. Na tahuna ranga a bole butu a vuranga na bakovi ni panaho. Na tahuna ranga a bole butu a vuranga ne huriki a viri nau a Israel. Na tahuna ranga a bole butu a vuranga ne huriki i uka ma ria a Israel. A bole butu a vuranga na maka tanga a bele ne ria. A bole butu a vuranga na robo i ngeki. A bole butu a vuranga na dari. A bole butu a vuranga ne huriki ri tatami ni ramai e Kristo. 27 A leho hateka, na parava ranga i uka ma a mahita kamumu. Na parava ranga a vitolo, a marohu, a malangangi a vuhuna a uka maki ni kavitagu iau vona.

28 I uka ma a maki nga kunana a bole a maregoa ne ria. Pali na parava vakaroro a loho lege ne huriki a tara na Vure na maka tanga a tovo ria pali na Velenga Kamumu. 29 Na tahuna a longoa a turagu tara i uka ma i pesi tora ni luhoi e Kristo, a dodoa. Na tahuna a longoa a bakovi tara i tulia a turagu tara ge rata a naro hale, i madihi hateka a hategu.

30 E huriki a nitamina apostolo nga ri bibi rike mule ria, lakea iau tara ga bibi rike iau. Pali i uka ma ga bibi rike iau na maki kamumu a rata. Ga bibi rike iau na hini a uka a nitora. 31 A Vure, e Tamane Bakovi Dagi ne hita, e Isu, ra ni gi kavurike ia vakaroro, i lohoka nau, i uka ma a tami mua. 32 ^mNa tahuna a lakea o Damaskus a matakari i leho ne Aretas a hariki, i ngaru ni lakavu iau. Lakea i rudu e huriki a tagari ri gi lakavu iau na poridala na tanga. 33 Pali e huriki a turagu vonga ri vakatavore puru iau na gagana nure dagi na tanga, lakea a ha.